काठमाडौँ- बाढी, पहिरो तथा अन्य प्राकृतिक विपद्बाट प्रभावित नागरिकको राहत, उद्धार तथा पुनः स्थापनाका लागि सिल्भर एजुकेसन फाउन्डेसन प्रा.ली. ले ३ लाख ३३ हजार ३ सय ३३ रुपैयाँ सहयोग गरेको छ।
सिल्भर एजुकेसन फाउन्डेसनले भाद्र १० गते रसुवा, नुवाकोट, धादिङ लगायतका क्षेत्रमा आएको बाढी, पहिरो तथा प्राकृतिक विपद्बाट प्रभावित नागरिकलाई सहयोग पुर्याउने उद्देश्यले प्रधानमन्त्री दैवी प्रकोप उद्धार कोषमा उक्त रकम प्रदान गरेको हो।
विपद्को कठिन समयमा प्रभावित नागरिकप्रति ऐक्यबद्धता जनाउँदै फाउन्डेसनले आफ्नो सामाजिक उत्तरदायित्वअन्तर्गत सहयोग उपलब्ध गराएको जनाएको छ। बाढी पहिरोबाट प्रभावित परिवारको राहत, उद्धार तथा पुनः स्थापनाका लागि राज्य र सम्बन्धित निकायबाट भइरहेका प्रयासमा आफ्नो तर्फबाट पनि योगदान पुर्याउने उद्देश्यले सहयोग गरिएको फाउन्डेसनले जनाएको छ।
शिक्षा क्षेत्रमा व्यावसायिक जिम्मेवारी निर्वाह गर्दै आएको फाउन्डेसनले सामाजिक उत्तरदायित्वलाई समेत आफ्नो महत्त्वपूर्ण दायित्वका रूपमा अघि बढाएको बताएको छ। समाजमा आवश्यक परेको समयमा आफ्नो क्षमता र स्रोतअनुसार सहयोग गर्ने प्रतिबद्धतासहित शिक्षा, सामाजिक सेवा तथा मानवीय सहयोगका क्षेत्रमा निरन्तर योगदान गर्दै जाने फाउन्डेसनको भनाइ छ।
फाउन्डेसनले आगामी दिनमा पनि विपद् तथा आपत्कालीन परिस्थितिमा प्रभावित नागरिकको आवश्यकताअनुसार सम्भव भएसम्म सामाजिक सहयोग, सहकार्य तथा मानवीय सेवाका कार्यलाई निरन्तरता दिने प्रतिबद्धता जनाएको छ।
सिल्भर एजुकेसन फाउन्डेसनले विपद्बाट प्रभावित सम्पूर्ण नागरिकप्रति ऐक्यबद्धता व्यक्त गर्दै राहत तथा उद्धारका कार्यमा खटिएका सरकारी निकाय, सुरक्षा निकाय, विभिन्न संघसंस्था, स्वयंसेवक तथा सहयोगी हातहरूप्रति धन्यवादसमेत व्यक्त गरेको छ।
